Acts 2

Lan Pentikos elana Yayaluwa Bwabwalena I Lau

1Sauga Yudiya wali hagali Pentikos hagalena ana lan i vin, toabulilek gegewel heliya iyoho hi migogo limi maisena elana. ^a 2Yaka butun etega i loem labulabumwa i ola mana gasigasisena butuna ge limi toto hi miminaa gamwana gegewena i pakalaopop. 3Inoke bugul etega hi kite, ana awa i ola ginaha memena i lovaleyan i tala maisena ge maisena pwataliyaa. ^b 4Inoke hi gewigewi Yayaluwa Bwabwalena hi kalaopopwi ge hi telipuna anan getoga ona hi baubaunan, i ola Yayaluwa Bwabwalena wana pek. ^c

5Saugena o Yudiya gamagaliliyau bolo wali tapwalolo hi nuwahikan bubun hi gewi heliya iyoho Yelusalema, hi noem panuwa gegewel panayawi pwatanaa hagali kaiwena. 6Sauga butun ya hi hago, yaka boda bwabwatana hi nogogo hi nowanik. Hi gewigewi nuwaliya hi ahe, kaiwena hi hago toabulilek hi baaba gamagal maisena ge maisena anana elana. 7Ateliya i you ge hi nuwa gewagewa, inoke hi ba, “Gamagalau bolo hi baaba ya, heliya Galili gamagaliliyau. 8Ga i ola ge kila maisena maisena ta hagol hi baaba anala tomaha ge tomaha elana? 9Kilau ta neem Patiya, Midiya, ge Elam; Mesopoteimiya, Yudiya, ge Kapadosiya; Pontas ge Eisiya; 10ta neem al Piligiya, Pampiliya ge Itipita ge Libiya ana labi elal, bolo panuwa Sailini labenaa. Enuna ta neem Loma, 11kilau enuna Yudiya gamagaliliyau, enuna nige Yudiya gamagaliliyau i oola yaa Yudiya wali tapwalolo iyaka ta ahe, ge kilau enuna ta neem Kiliti ge Alebiya—yaa kila maisena ge maisena ta hagol Yehoba wana ginol bwabwatal hi wasaan anala tomaha ge tomaha elana.”

12Gegewel ateliya i you ge nuwaliya i samwawinwin, inoke avaliyau hi nelil hi ba, “Bugul ya ana sapu ga i ola?”

13Yaa enuna toabulilek hi talawasi-agil hi ba, “Gamagalau ya oine hi im nabiyan.”

Pita wana Papaatena Boda eliyalil

14Inoke Pita i milil, alonau ge alonau ali toto elulutega maisena, ge i baaba boda elal, anana i bwata, i ba, “Taliwau ge nuwau, Yudiya gamagaliliyau ge Yelusalema ana tomina ku gewigewi, no baaba nuku hago ge nuwamiu ni sapu. 15Ama nige ha iim kokona i oola wami nuwatu. Sauga ya naen kilok mweluluga ya te, ge nige kila wala pagan i oola tage oine ta im mweluluge. 16Bugul toto sauga ya ku kite heiya toto palopita Yoeli i baunan, i ba:

17Yehoba i ba, ‘Sauga mowamowasena elana,
Yayaluwau na ligin gamagalau gegewel elal.
Inoke natumiyau melubolau
ge meluyowau nihi palopisai,
i ola al wami hevalau ge wami tonowakau pankite ge kenonou toto i neem
Yehoba elana nihi kite ge nihi kenonouan. ^d
18Ibwe, lan bolo o elal, Yayaluwau na ligin al no
totuwalali melubolau ge meluyowau elal,
inoke nihi palopisai.
19Ginol yawiyawi na ginolil labulabumwa,
sabwelu ni gogou ge
waikena ni ket ni ola saliya;
ge abapankite na ginolil panayawiya,
saliya, ginaha ge kasu babalona nihi masal.
Mulaa abwe Babala wana
lan bwabwatana ge wawasana ni vin.
21Ge inoke henala ebo labe kaiwena ni awanun
Babala elana mwal ni pwawa.’”
22Pita i ba al i ba, “Gamagalau Isileli, ku laegan no baaba ya elana! Yehoba i pankitemiu tunahot iya wana totuwalali te Yeisu, kaiwena gasisi ge ginol yawiyawi i talamwan Yeisu i ginolil. Iyaka ku atena to, kaiwena i ginol gamwamiwa. 23Houhouwena Yehoba i nuwatu haba Yeisu kaiwena inoke i talamwan nimamiwa inoke alomiyau ge Loma, gamagalau nanakil, ku lokolosan ge i yaomal. 24Yaa Yehoba i palutem salaiya ge i pwamwalem yaomal wana gasisi elana, kaiwena yaomal nige i bosowaina ni kukuhikan. 25He Yeisu bana te Deibid i ba ola hiwe:

Yehoba ya kite i houwaagau sauga gegewena,
nige na lamwalamwaniu
kaiwena iya i minaa labewa. ^e
26Heiya te kaiwena nuwawaisi
ateu i kalaopopwi ge no baaba i yaliyaliyaya.
Bwagana ebo abwe na aliga, Yehoba wam bateli
ya nuwahikan ge ateu i matuwaan,
27kaiwena nige nu teteli yohau salaiya,
nige nu tatalam wam
totuwalali bwabwalena tuwana ni bweyan.
28Yawal ana kamwasa iyaka u pankiteyau,
wam yaliyaya ni pakala-
opopwau kaiwena maninimwa na minaa.
29“Taliwau ge nuwau, na ba bubun ya. Tubula kin Deibid i yaomal ge hi yamwi, salaina iyahe te i minamina lan ebe. ^f 30Yaa iya palopita, ge i atena Yehoba bateli gasigasisena etegana i ginol te tubutubunina etega ni tabwa kin ni ola iya. ^g 31Inoke i kite pahuwala hauna abwe Yehoba ni ginol, yaka Mesaiya wana lut al bana i ba:

‘Yehoba nige i teteli yoho salaiya,
tuwana nige ni bwebweyan.’ ^h
32Yeisu toto ya Yehoba i palutem yaomala, ge ama ha kite ha tabwa ana towasa. 33I ha labulabumwa i minaa Yehoba labena awonaa, yaka Yayaluwa Bwabwalena i aheya Tamana elana i ola wana bateli. Inoke i ligin eliyama ge bugul bolo sauga ya ku kite ge ku hago hi masal. ⁱ 34He nige Deibid i haha labulabumwa, yaa iya i ba:

Yehoba i baek no Babala elana i ba,
‘U misiyowa labeu awowa ^j
35inoke am topihigelgel na
teli lowagil aem gabulanaa.’
36“Gamagalau Isileli ku gewigewi, nuku atena bubun Yeisu toto komiu ku lokolosan, Yehoba i teli heyan iya Babala ge Mesaiya.” ^k

37Sauga gamagalau baaba ya hi hago, yaka hi nuwanuwatu nabi, inoke hi baek Pita ge apostolowau gegewel elal hi ba, “Talimeyau, hauna naha ginol?”

38Pita analiya i lahe i ba, “Maisena ge maisena wami gegi ana en nuku pek ge nuku babitaiso Yeisu Keliso alana elana, inoke wami gegi Yehoba ni nuwayoho. Yaka Yayaluwa Bwabwalena nasi nuku ahe, iya Yehoba wana mulolu. 39Kaiwena Yehoba bateli ya i ginol kaiwemiu, tubumiyau kaiweliya, ge gamagalau gegewel bolo wali panuwa ana bwaga i yapu kaiweliya—gegewel bolo ebo Yehoba wala Yabowaine ni yogaagil nihi nem elana.” ^l

40Baaba hi gewi al Pita i baunan elal ge i ba pagasisel i ba, “Nuku pwamwalimiu, bahi heyan nanakil ya ali lahi nuku pwapwawa.” 41Bolo Pita wana papaatena hi abulilek-an hi pababitaisoil, inoke lan o gamagalau ali gewi tili tausan hi tuk ge ali boda hi paetulan. ^m

Toekelesiya Houhouwel wali Pagan

42Toabulilek bolo o hi talamwagil sauga gegewena apostolowau wali papaatena nihi hago, nihi mipamaisena avaliyau ge wali pan toabulilek, nihi anan toyawa Yeisu wana yaomal ana nuwahikan kaiwena, ge nihi awaawanun Yehoba elana. ⁿ 43Apostolowau ginol yawiyawi ge abanuwa ahi i gewi hi ginolil inoke gamagalau gegewel hi kite, ginebi wali lovakun ge awatauwan. 44Sauga gegewena toabulilek hi heliheliyam toyawa ge wali bugubugul ana nuwatu eliyalil i ola te gegewel wali bugul. ^o 45Wali bugubugul ge wali gogomwau nihi paliagil inoke molana mani nihi ahe ge nihi pek henala ebo ana pulowan i gan eliyana. 46Lan maisena ge maisena ali pwahin elana hi mimigogo Limi Bwabwalena gamwanaa. Wali limi elal, ginebi wali hanalau ge wali yaliyaya, hi anan toyawa Yeisu wana yaomal hi nuwahikan, 47ge Yehoba hi tobatobal-an. Inoke gamagalau gegewel toabulilek wali ginol hi awa wawaisi-an. Lan maisena ge maisena Babala gamagalau enuna al i pwapwamwalil, inoke ali boda i papaetulan. ^p